ភ្នំពេញ ថ្ងៃទី២៧ ខែធ្នូ ឆ្នាំ២០២៤៖ នាយករដ្ឋមន្ត្រីកម្ពុជា សម្ដេចមហាបវរធិបតី ហ៊ុន ម៉ាណែត បានជួបពិភាក្សាការងារជាមួយ ឯកឧត្តម Murai Yoshihiro អភិបាលខេត្ត មីយ៉ាហ្គិ និងជាប្រធានសមាគមអភិបាលប្រទេសជប៉ុន ដើម្បីសម្តែងការគួរសម នៅវិមានសន្តិភាព នាព្រឹកមិញនេះ។ កិច្ចប្រជុំនេះផ្តោតលើការពង្រឹងកិច្ចសហប្រតិបត្តិការរវាងអាណាខេត្តជប៉ុន និងកម្ពុជា។

ក្នុងជំនួបនោះ អភិបាលខេត្ត មីយ៉ាហ្គិ ជម្រាបជូនពីការការចុះអនុស្សរណៈនៃកិច្ចសហប្រតិបត្តិការ រវាងខេត្តមីយ៉ាហ្គិ នៃប្រទេសជប៉ុន និងក្រសួងការងារ និងបណ្ដុះបណ្ដាលវិជ្ជាជីវៈ នៃព្រះរាជាណាចក្រកម្ពុជា។ កិច្ចព្រមព្រៀងនេះមានគោលបំណងជំរុញដល់ការបញ្ជូន និងទទួលកម្មសិក្សាការី និងពលករជំនាញរបស់កម្ពុជា ទៅកាន់ខេត្តមីយ៉ាហ្គិ ក៏ដូចជាការឆ្លើយតបទៅនឹងតម្រូវការទីផ្សារការងារទាំងនៅកម្ពុជា និងនៅជប៉ុន តាមរយៈការផ្ទេរជំនាញបច្ចេកទេស។

អភិបាលខេត្ត មីយ៉ាហ្គិ បានបង្ហាញជំនឿជឿជាក់ថា កិច្ចសហប្រតិបត្តិការនេះនឹងរួមចំណែកយ៉ាងសំខាន់ដល់ការអភិវឌ្ឍន៍ និងការបណ្តុះបណ្តាលធនធានមនុស្សកម្ពុជានាពេលអនាគត។ អភិបាលខេត្ត ក៏បានអះអាងសារជាថ្មីនូវការប្តេជ្ញាចិត្តរបស់លោកក្នុងនាមជាប្រធានសមាគមអភិបាលខេត្តជប៉ុន ក្នុងការលើកកម្ពស់បន្ថែមទៀតនូវភាពជាដៃគូរវាងខេត្តជប៉ុន និងកម្ពុជា។

ជាការឆ្លើយតប សម្តេចនាយករដ្ឋមន្ត្រី ហ៊ុន ម៉ាណែត បានអបអរសាទរអភិបាលក្រុង មីយ៉ាហ្គិ ចំពោះការចុះអនុស្សារណៈនៃកិច្ចសហប្រតិបត្តិការ ដែលធ្វើឡើងកាលពីថ្ងៃទី ២៦ ខែធ្នូ។ សម្តេចនាយករដ្ឋមន្ត្រី បានថ្លែងអំណរគុណចំពោះរដ្ឋាភិបាលជប៉ុន និងប្រជាជនរបស់ខ្លួនសម្រាប់ការគាំទ្រជាបន្តបន្ទាប់ក្នុងការស្វែងរកសន្តិភាពរបស់កម្ពុជាចាប់តាំងពីទសវត្សរ៍ឆ្នាំ ១៩៩០ មក ដោយបានជួយដល់ការស្ដារ និងកសាងអភិវឌ្ឍសង្គម-សេដ្ឋកិច្ច ឱ្យមានការរីកចម្រើនលើគ្រប់វិស័យដូចសព្វថ្ងៃនេះ។

សម្តេចនាយករដ្ឋមន្ត្រីបានកត់សម្គាល់ពីវឌ្ឍនភាពដ៏រឹងមាំក្នុងទំនាក់ទំនង និងកិច្ចសហប្រតិបត្តិការរវាងប្រទេសទាំងពីរ ហើយបានថ្លែងអំណរគុណដល់រដ្ឋបាលខេត្ត មីយ៉ាហ្គិ និងរដ្ឋាភិបាលជប៉ុន ដែលបានយកចិត្តទុកដាក់ចំពោះកម្មសិក្សាការី និងកម្មករជំនាញកម្ពុជាដែលរស់នៅក្នុងប្រទេសជប៉ុន។

សម្តេចនាយករដ្ឋមន្ត្រី បានសង្កត់ធ្ងន់ថា អនុស្សរណៈនៃកិច្ចសហប្រតិបត្តិការនឹងបន្តចូលរួមចំណែកដល់ការពង្រឹង និងពង្រីកកិច្ចសហប្រតិបត្តិការរវាងប្រទេសទាំងពីរឱ្យកាន់តែរឹងមាំថែមទៀត ជាពិសេសទំនាក់ទំនងរវាងប្រជាជននិងប្រជាជន ក៏ដូចជាចូលរួមពង្រឹង និងអភិវឌ្ឍធនធានមនុស្សនៅកម្ពុជា លើជំនាញផ្នែកយានយន្ត, បច្ចេកវិទ្យា និង ឌីជីថល ដែលនឹងឆ្លើយតបទៅនឹងតម្រូវការរបស់កម្ពុជា ក៏ដូចជាទីផ្សារការងារនៅប្រទេសជប៉ុនទាំងនាពេលបច្ចុប្បន្ន និងអនាគត។

នាយករដ្ឋមន្ត្រី សម្តេចធិបតី ហ៊ុន ម៉ាណែត ក៏បានលើកទឹកចិត្តដល់រដ្ឋបាលខេត្ត មីយ៉ាហ្គិ រក្សាទំនាក់ទំនងជិតស្និទ្ធជាមួយក្រសួងការងារ និងបណ្តុះបណ្តាលវិជ្ជាជីវៈកម្ពុជា ដើម្បីបង្កើតផែនការអភិវឌ្ឍន៍ជាក់ស្តែងឆ្ពោះទៅមុខ៕